ئۆپۆزسیۆن بۆ چارەسەر كردنى سەرجەم كێشەكان لە ئاستى كوردستان و عێراقدا خاوەنى پرۆژەى چاكسازى و بنەڕەتیە.
سێ شەممە, 14 شوبات 2012 15:30
پێنوسهکان..
فراكسیۆنەكانى ئۆپۆزسیۆن یاداشتێكى هەشت خاڵى ئاڕاستەى سەرۆكایەتى پەرلەمان دەكەن
بۆبەرێز/ سەرۆكایەتى پەرلەمانى كوردستان
یاداشتێك لەلایەن هەرسآ فراكسیۆنى ئۆپۆزسیۆنەوە
سڵاورێز...
هەل و مەرجى ناوچەكەو عێراق و هەرێمەكەمان لەبەردەم گۆڕانكارى نوێدایە، لە كاتێكدا سیستەمى سیاسیى لە هەرێمدا تووشى قەیران و ئاستەنگى قوڵ بووە و پەرلەمان وەكو دەزگایەكى سەرەكى سیاسیى دابڕاو نیە لەم قەیران و گرفتانەى هەرێمەكەمان كە دووچارى بووە.
ئۆپۆزسیۆن بۆ چارەسەر كردنى سەرجەم كێشەكان لە ئاستى كوردستان و عێراقدا خاوەنى پرۆژەى چاكسازى و بنەڕەتیە.
فراكسیۆنەكانیشمان لە پەرلەمان لە دوو ساڵى رابردوودا لە هەوڵى بە دامەزراوەكردن و كاراكردنى ئەم دەزگایە بوون، بەڵام بەهۆى باڵا دەستى هەژموونى حزبى و سیاسیى نەبۆتە مەرجەعى یەكلاكردنەوە و چارەسەركردنى پرسە گرنگەكان. بۆ چارەسەر كردنى كێشەكان و كاراكردنى پەرلەمان و بە دامەزراوەكردنى هەرێمەكە، ئێمە لە فراكسیۆنەكانى ئۆپۆزسیۆن رامان وایە پەرلەمان دەتوانىَ رۆلى كاراى خۆى ببینىَ بە بەشدارى كردنى هەموو پێكهاتەكان لە ناوەندى بریارى سیاسیى و یاساییدا. بە تایبەتى پەرلەمان كە باڵاترین دامەزراوەى یاسا ڕێژى و چاودێریە لە هەرێم و نوێنەرى هەلبژێردراوى خەڵكى كوردستانە. دەبوایە لە ئاڵوگۆرو دانانى كارنامەى سەرۆكایەتى پەرلەمان پرس و ڕای بە سەرجەم پێكهاتەكانى ناو پەرلەمان بكردایە كە نەیكردوە.
بۆیە لەم ئالوگۆڕەدا ناكرآ فەرامۆشى پرۆژە و كارنامەى ئۆپۆزسیۆن بكرێت.بۆیە داواكارین ئەم خاڵانە بخرێنە كارنامەى وەرزى نوێى پەرلەمان:
1- پاراستنى هەیبەت و پێگەى پەرلەمان و پەرلەمانتاران، بەكاراكردنى ڕۆڵى چاودێرى پەرلەمان بەسەر وەزارەت و دەزگا حكومیەكانەوە و كار ئاسانى بۆ بەدواداچون و پرسینەوە.
2- كۆتایى هێنان بە دەستێوەردانى حزبى لە كاروبارى پەرلەمان و ئەولەویەتى كارى لیژنەكان و ئامادەكردنى پرۆژە یاساكان.
3- پەیڕەویى ناوخۆ یەكێكە لە بەربەستە سەرەكیەكانى كاراكردنى پەرلەمان، بۆیە پێویستە پەیڕەوە نوێیەكە بەسازانو بەشدارى هەموو لایەك بە زووترین كات هەمواربكرێتەوە.
4- بەپآى گرنگى پرۆژە یاساكان، هەموو ئەو پرۆژە یاساییانەى كە پەیوەستن بە ژیانى گشتى و سیاسى هەرێمى كوردستانەوە. دوا نەخرێت و بەپآى بەرنامە بخرێتە كارنامەى دانیشتنەكانى داهاتوەوە لەگەڵ ئەو پرۆژانەى تر لەلایەن لیژنەكانەوە راپۆرتیان تەواو بوە،ئەو پرۆژانەشى تا ئێستا راپۆرتى لیژنەكانى تەواو نەبووە، تەواوبكرێن و بخرێنە بەرنامەى كارەوە.
5- پابەندبوونى پەرلەمان و بە پابەندكردنى حكومەت بەجآبەجآ كردنى بریارى ژمارە (2) ساڵى 2011 و بریارە (17) خاڵەیەكەى پەرلەمان كە تایبەتن بە خواستى خۆپیشاندەرانى (17) شوبات و بریارەكانى تایبەت بە رووداوەكانى ناوچەى بادینان. لە 7/12/2011
6- بەشدارى لە دانانى كارنامەو سازان لە هەموو ئەو یاسایانەى رەهەندى نیشتیمانیان هەیە وەك.
أ- رەشنووسى دەستوورى هەرێم (كە پەرلەمان بریارى هەیە بۆ گێرانەوەى)
ب- یاساى ئەنجومەنى ئاسایش.
ج- یاساى دەزگاى ئاسایش.
د- یاساى رێكخستنى خۆپیشاندان.
ه- هەمواركردنى یاساى ئەنجومەنى پارێزگاكان.
7- ئەو پرۆژە یاسایانەى رەهەندى نیشتیمانیان هەیە كە تائێستا بریاریان لەسەر نەدراوە لە نزیكترین كاتدا بخرێنە بەرنامەى كارەوە وەك:
أ- بەیاسایى كردنى پاكێجەكانى ئۆپۆزسیۆن.
ب- كۆمسیۆنى باڵاى سەربەخۆى هەلبژاردن
ج- یاساى بودجەى حزبەكان.
8- داوا دەكەین ئەم یاداشتە بخرێتە بەرنامەى كار بۆ گفتوگۆ و پەسەندكردنى وەك بریارێك لە پەرلەمانى كوردستاندا.
فراكسیۆنى گۆڕان فراكسیۆنى یەكگرتوو فراكسیۆنى كۆمەڵ
14/2/2012