راگەیاندراوی كومیتەی ناوەندی بە بۆنەی 33 هەمین ساڵوەگەڕی رووخانی رژێمی پاشایەتییەوە
یەک شەممە, 12 شوبات 2012 01:45
هاونیشتمانانی خۆڕاگر
لاوانی ناسیۆنالیست
كۆڕوكۆمەڵە سیاسییە كوردستانی و نێونەتەوەیییەكان
22ی رێبەندانی 1357ی هەتاوی بەرانبەر بە 12ی فوریەی 1979، لە ئاكامی خەباتی هەمەلایەنەی گەلانی ئێران، سیستەمی پاشایەتی بنەماڵەی پەهلەوی داڕما.
لە هەرەسهێنانی رژیمی پاشایەتیدا، هەموو گەلانی ئێران و بە تایبەت نەتەوەی كورد خەباتێكی شێلگیرانەی كردبوو. بە دەستی بنەماڵەی پەهلەوی چەند شۆڕشی گەورەی نەتەوەیی ئێمە – شۆرشی سمایل ئاغای سمكۆ و قەدەم خێر شۆڕە ژنی كورد و كۆماری كوردستان و پێشەوا و شەڕی چەكداریی 46-47 و ... - هەرەسی هێنابوو و دەیان كاراكتەری خەبات و بەرەنگاریی نەتەوەییمان لە ناو زیندانەكانی رژێمدا ساڵانێكی زۆر ئەشكنجە و لە مافی ژیان بێبەش كرابوون و بۆیە پێویست بوو كورد كاراكتەرێكی گەورەی گۆڕەپانی رووخاندنی پاشایەتیی ئێرانی بێت.
بەڵام راست ئەوەی كە خەونی گەلانی بندەستی ئیمپراتووریای ئێران و بە تایبەت نەتەوەی كوردبوو، نەهاتەدی. چونكا رژیمێكی دیكتاتۆری ئایینیی دواكەتووی خوێنڕێژ دەستی بەسەر دەسكەوتی شۆڕشە خوێناوییەكەدا گرت و تەنیا ناوی پاشا لە كەسێكی سیكۆلارەوە بۆ مەزهەبی گۆڕدرا.
مەلاكانی ئێران بە سەرۆكایەتیی خومەینی، دەسەڵاتەكەیان بە قازانجی خۆیان پاوان كرد و كۆمارێكیان لە خوێن و سێدارە بۆ كوشتنی خەونی هەموو نەتەوە بندەستەكان دروست كرد. ئەمەش بووە هۆی ئەوەی لەگەڵ درێژبوونەوەی شۆڕشی گەلەكەماندا، ئەمجارەیان دەسەڵاتدارانی كۆماری ئیسلامی، 33 ساڵە شۆڕشەكەمان سەركوت بكەن.
لەم راستایەشدا كومیتەی ناوەندیی"یەكێتی شۆڕشگێڕانی كوردستان" داواكانی خۆی بۆ زووتر بە ئامانج گەیاندنی خەباتی هەمە لایەنە بۆ رووخانی كۆماری ئیسلامی دەخاتە بەردەستی كۆڕ و كۆمەڵە ناوخۆۆی و نێودەوڵەتییەكان:
1- نەتەوەكانی بندەستی ئێران مافی خۆیانە كە لە ژێر چنگی داگیركاران رزگاریان ببێ و دەوڵەتی سەربەخۆی خۆیان دابمەزرێن. كەوابوو بۆ ئەم مەبەستەش پێویستە خەباتكارانی نەتەوەكانی بندەستی دیكەی وەك نەتەوەی كورد لە پێناو هەڵوەشانەوەی جوغرافیای سیاسیی ئێراندا خەبات بكەن.
2- ئێستا كە كۆڕ و كۆمەڵە نێونەتەوەیی و نێودەوڵەتییەكان بەو ئاكامە گەیشتوون كە كۆماری ئیسلامیی ئێران مەترسییەكی جددییە بۆ سەر كۆمەڵگای جیهانی، دەبێ لە هەموو شێوازێك بۆ لەناوبردنی ئەو مەترسییە كەڵك وەرگرن و ئەمەش لە لای ئێمەی كورد و ناسیۆنالیستەكانی دیكەش بە ڕەوا دەزانرێ و پشتگیری و پێشوازی لێدەكرێ.
3- ئۆپۆزیسیۆنی ئێرانیش بۆ ئەوەی وەك كاتی شۆرشەكەی ساڵی 1357ی هەتاوی رەنج بە خەسار نەبن و ببنە خاوەنی دەوڵەتێكی دیمۆكراتیك، دەبێ زۆر بە جددی رەچاوی داخوازییەكانی سەرجەم داواكانی نەتەوەكانی جیاواز لە نەتەوەی باڵادەست بكەن.
4- ئێستاكە كۆماری ئیسلامی ئێران و دۆستە هاوتەریبەكانی بەرەو كۆتایی دەسەڵاتیان دەڕۆن، كۆمیتەی ناوەندیی "یەكێتی شۆڕشگێڕانی كوردستان" لە سەرجەم هاوخوێنەكانمان لە پارچەكانی دیكەی كوردستان داوا دەكات، بۆ یەكخستنی ماڵی كورد لە رۆژهەڵاتی كوردستان لەم هەلومەرجە هەستیارەدا لە هیچ جۆرە دڵسۆزییەك تا دروستبوونی بەرەی كوردستانی درێغی نەكەن. چونكا ئێمە ڕامان وایە، خۆمان بۆ یەكخستنەوەی ریزەكانمان، لە ئۆپۆزیسیۆنی فارسی بەهێزتر و بۆخۆیشمان دڵسۆزترین.
لە كۆتاییدا لە 33 هەمین ساڵوەگەڕی رووخانی دەسەڵاتی پاشایەتیدا، جارێكی دیكە هاوخوێنەكانمان بانگهێشت دەكەین كە لە پێناوی رووخانی ئەم دەسەڵاتە نگریسەشدا لە هیچ جۆرە فیداكارییەك خۆ نەبوێرن. دڵنیا بن كە سەركەوتنمان نزیكە.
بژی كورد
پایەدار بێ كوردستان
كومیتەی ناوەندیی
یەكێتی شۆڕشگێڕانی كوردستان
22ی رێبەندانی 2711