کۆنفرانسی شەشەمی"یەکێتی شۆڕشگێڕانی کوردستان" دوو هێزی رزگاریخوازی رۆژهەڵاتی کوردستانی پێکەوە گرێدا.
پێنج شەممە, 02 شوبات 2012 01:03
بۆ ڕای گشتی
هاونیشتمانانی خۆڕاگر
لاوانی ناسيوناليست
كۆڕو كۆمەڵە سیاسییەكانی كوردستان
بە سەرنجدان بە هەلومەرجی خەباتی رزگاریخوازانەی نەتەوەییمان لە رۆژهەڵاتی كوردستان و هەستكردن بە پێویستییەكانی ئەم قۆناغە لە خەبات، پاش یەك حەوتوو كۆبوونەوەو راوێژی چڕ لە نێوان ئەندامانی سەركردایەتی "یەكیەتی شۆڕشگێڕانی كوردستان" و "پارتی لیبراڵ دیمۆكراتی كوردستان" بەو ئاكامە گەیشتین كە لەسەر بنەمای ئەم خاڵانەی خوارەوە یەك بگرین و یەكیەتیی نەتەوەییمان بەرفراوانتر بكەین.
1- "یەكێتی شۆڕشگێڕانی كوردستان" و "پارتی لیبراڵ دیمۆكراتی كوردستان" پێكهێنەری "هاوپەیمانی ستراتێژیی رۆژهەڵاتی كوردستان" بوون و لەگەڵ شێوازی خەبات و ئاكاری سیاسیی یەكتر ئاشنا بوون.
2- "یەكێتی شۆڕشگێڕانی كوردستان" هەر لە سەرەتای دامەزراندنیەوە ئاڵاهەڵگری یەكڕیزی و پێكەوەبوون، لەسەر بنەمای خزمەتی باشتر بە قۆناغی خەباتی رزگاری نەتەوەیی بووە و هیچ لەمپەڕێكیشی لەسەر رێگای یەكبوون و یەكڕیزیدا دانەناوە و "پارتی لیبراڵ دیمۆكراتی كوردستان"یش هەر بەو گوتارەوە رووی كردووەتە گۆڕەپانی خەباتی رزگاریخوازانەی نەتەوەیی.
3- لە ماوەی یەك حەوتوو راوێژ و كۆبوونەوەی هەردوو لایەندا لەسەر پەیامی "رزگاری و سەربەخۆیی و دەوڵەتی كوردی كۆك بووین و كاركردن بۆ گەشەپێدانی ئەو سیاسەتانەی كە دادپەروەری لە كۆمەڵگای داهاتووماندا دەچەسپێنێ وەكو ئامانجێكی بەرز پێداگری لەسەر كرایەوە.
4- هەر دوو لایەنی خەباتكار، بە مەبەستی كاركردن بۆ رەخساندنی بارودۆخێكی گونجاو بۆ خەباتی رزگاریخوازانە، لەسەر ئەوە كۆك بووین، كە هیچ هێڵێكی سوور لەسەر رێگای پێكهێنانی گۆڕانكاریدا نەبێت و لە پەیڕەو پڕۆگرامی هەردوو لایەن بۆ دروستكردنی بەرنامەیەكی هاوبەش و سەردەمیانەتر كەڵك وەربگیردرێ و هەر لەم رێكەوتەوە "هەیئەتی گۆڕانكارییەكانی پەیڕەو و پڕۆگرام" پێك دێت، كە كار لەسەر یەكخستنی پێشنیار و خاڵەكانی بەرنامەكان دەكەن و هەر لە لۆگۆی حیزبییەوە تاكو سیاسەتەكانی یەكێتییەكەمان دەخرێنە بەردەست بۆ تاوتوێكردن و گۆڕانكاریی باشتریان بەسەردا دێت و كۆنفرانس لە دوای كۆنفرانسیش گۆڕانكارییەكان دەخرێنە بەر دیدی رای گشتی.
5- هەر لە ریگای ئەم بەیاننامەوە رایدەگەیەنین كە بە كۆی دەنگی ئەندامانی سەركردایەتی، هاوڕێ: "سمكۆ یەزدانپەنا" وەك سكرتێری گشتی و هاوڕێ: "عەلی زیرەك" وەك جێگری سكرتێری گشتی "یەكیەتیی شۆڕشگێڕانی كوردستان" دیاریكران.
هاونیشتمانانی خەباتخواز و نەتەوەیی
كۆڕوكۆمەڵە سیاسی و هۆشیارەكانی رۆژهەڵاتی كوردستان
لاوانی ناسیونالیست
یەكێتییەكەمان لەسەر بنەمای خزمەتی باشتر بۆ بڕینی زووتری قۆناغی رزگاریی نەتەوەییمان، باوەشی بۆ هەر حیزب و لایەنێكی سیاسی كە لەسەر ئەو بنەمایانەی سەرەوە بۆ یەكبوون و یەكگرتن خەبات دەكات، بە گەرمی ئاوەڵایە و لەو پێناوەشدا و بۆ یەكخستنی شۆڕشگێڕانی نەتەوەكەمان لە یەكێتییەكی بەرفراواندا هیچ هێڵێكی سووری دانەناوە.
سڵاو لە ئیرادەی یەكبوون و یەكگرتن
بژی كورد
پایەدار بێت كوردستان
كۆمیتەی ناوەندی
"یەكێتی شۆڕشگێڕانی كوردستان"
١/٢/٢٠١٢