بڕوخێ ئهردۆگان
پێنج شەممە, 29 کانونی یەکەم 2011 19:24
نوسینی: عارف قوربانی
ئەردۆگان ئەم جەنگە خوێناوییەی دژی كورد لە كوردستانی توركیا بەرپای كردووە، ناوی لێ ناوە (جەنگی دژە تیرۆر)، هیچ گومان لەوەدا نییە كە ئامانج لە داتاشینی ئەم ناوە بە شەڕی دژی كورد، بۆ چەواشەكردنی رای گشتی دنیایە بەرانبەر ئەو رەشەكوژییەی لە كوردستانی توركیا ئۆپەراسیۆنەكانی سوپا لەژێر پەرچەمی حكوومەتەكەی ئەردۆگاندا ئەنجامی دەدەن. هەروەك بۆ راكێشانی سەرنجی كۆمەڵگەی نێودەوڵەتییە بۆ شەرعیەتدان بە رووبەڕووبوونەوەی خواستەكانی كورد لەو وڵاتە بە پاساو و بیانووی (كردەوەی تیرۆریستییەوە).
گەریلاكانی كورد لەو وڵاتە خەبات بۆ بەدەستهێنانی ئازادی و مافەكانی میللەتێكی 25 ملیۆنی دەكەن كە لەلایەن دەسەڵاتدارانی توركەوە نكووڵی لە بوونیان دەكرێت. پرسیارەكە ئەمەیە ئەگەر كوشتنی مرۆڤێك تاوان و كار و كردەوەی تیرۆریستی بێت، بۆچی ئەگەر گەریلاكان بۆ داكۆكیكردن لە مافی ژیان و داخوازیی رەوای میللەتێك، سەربازێكی تورك بكوژن، دەچێتە چوارچێوەی كردەوەی تیرۆریستییەوە. بەڵام ئەگەر دەسەڵاتی ئەو وڵاتە نەك هەر سەدان گەریلا، بەڵكو سەدان هاووڵاتیی مەدەنیش بكوژێت، پێی ناوترێت تیرۆر؟
دەپرسم ئایا ئەوەی لە گوندی (رۆبۆسكێی ناوچەی شەرناخ) رووی دا و بەهۆی بۆردمانی فڕۆكە و پەلاماری سوپای توركەوە (35) هاووڵاتی لە چەند چركەساتێكدا بوونە قوربانی، كاری تیرۆریستی نییە؟ ئەی چما ئەوانەش هەر مرۆڤ نین؟ بۆچی ئەگەر سەربازێكی داگیركەر و زەوتكەری ژیان و ئازادیی هاووڵاتییان لە كاتی مومارەسەكردنی زوڵمەكەیدا بەدەستی شۆڕشگێرێكی كورد دەكوژرێت، پێی دەڵێن تیرۆر كراوە. ئەی ئەو دەیان و سەدان هاووڵاتییەی كورد كە بەدەستی جەلادەكانی سوپای توركیا دەبنە قوربانی، ناوی چی لێ دەنێن؟
ئەگەر تەقینەوەیەك لە شارێكی توركنشین ئەنجام بدرێت و چەند توركێك تیایدا ببنە قوربانی، میدیاكان سەرنجی جیهانی بۆ رادەكێشن و وەك كارێكی قێزەون دەیخەنە روو. بەڵام ئەگەر تاوانێكی زۆر لەوە گەورەتر لە ناوچە كوردستانییەكانی توركیا روو بدات، وەك رووداوێكی ئاسایی و هەندێجار وەك چالاكیی سەربازی بۆ رووبەڕووبوونەوەی تیرۆر لەقەڵەمی دەدەن. ئەمە هەموومان دەخاتە بەردەم بەرپرسیارێتییەوە. وە ئەگەر لەئاستیدا بێدەنگ بین، ئەوە بە پاساوی تیرۆرەوە پرۆسەی كوردقڕان لە توركیا پەرەدەسێنێ.
ئەركی ئێمەش لەم دۆخەدا ئەرك و بەرپرسیارێتییەكی نەتەوەیی و نیشتمانی و ئەخلاقییە، كە دەبێ رێگە لەو كۆمەڵكوژییە بگرین.
ئێمە لەم بەشەی كوردستانی بە عێراقەوە لكێندراو، كاتێ گوندێكمان دەڕووخا، ئەنفال دەكراین، گللەییمان لە جیهانی ئیسلامی و دنیای عەرەب و جیهان دەكرد، بۆ بێدەنگ بوون و چاویان لە ئاستی ئەو هەموو تاوانە كوێر كردبوو؟ ئەی ئێستا پێویستە خۆمان لەبەرانبەر تاوانێكی لەم جۆرەدا چی بكەین؟ سەركردەكانی كورد بۆ كوشتنی دە سەربازی تورك پرسەنامە و نیگەرانیی خۆیان ئاراستەی سەرانی توركیا كرد، ئەی ئێستا كاتی ئەوە نییە بەرانبەر رەشەكوژی و بەكۆمەڵكوشتنی گوندەكانی كوردستانی توركیا هەڵوێستی توندمان هەبێ و جیهان لەو تاوانە بێنینە دەنگ؟
ئایا ناتوانین ئاراستەی رەوەندی كوردی بكەین لە سەرتاسەری جیهان بچنە بەردەم سەفارەتی توركیا؟ ئایا ناتوانین كوردانی توركیا هان بدەین خۆپێشاندانی یەك ملیۆنی لە ئەستەنبوڵ رێك بخەن و داوای رۆیشتنی ئەردۆگان بكەن؟ ئەی چما ئەمڕۆ سەردەمی شۆڕشی میللەتانی چەوەساوە نییە؟ ئەی بەهاری عەرەبی باهۆزێك نییە بۆ ناوچەكە تا ماف و ئازادی بۆ هاووڵاتییان دەستەبەر بێت؟
پێویستە كورد هێزە سیاسییەكانی هەموو پارچەكانی كوردستان، بە هەستكردن بە بەرپرسیارێتی نەتەوەیی و ئەخلاقیی سەرشانیان هەستن و لە سەرووی هەمووشیانەوە دەبێ هەرێمی كوردستان خۆی بكات بەخاوەنی ئەم مەترسییە و پلان و بەرنامەی هەبێ بۆ رووبەڕووبوونەوەی.
هیچ كاتێكیش وەك ئێستا زەمینە لەبار نییە بۆ سەرنج راكێشانی جیهان و بەدەستهێنانی پشتیوانیی نێودەوڵەتی، لە بەگژاچوونەوەی ئەم ستەمكارییەی بەرانبەر بە كورد دەكرێت. بۆیە نابێ كورد كەمتەرخەم و خوێنساردانە مامەڵە بكات، پێویستە بەجۆرێك رووبەڕووی ببێتەوە، ببێتە سنوور و عیبرەت بۆ هەر كەسێك بیر لە ستەمكاری بكاتەوە.
ئەمڕۆ دەرفەتە لەگەڵ پەرەسەندنەكانی شۆڕشی میللی لە سووریا، كوردانی كوردستانی توركیاش دەست بدەنە خۆپێشاندانی جەماوەریی فراوان و داوای رژێمی دیموكراسی و ئازادی و مافەكانیان بكەن. بەڵام ئەم هەنگاوە پێویستی بە رێنوێنی و هاوكاری و پشتیوانیی ئێمە هەیە. دەبێ سەركردەكانمان سڵ نەكەنەوە لە گرتنەبەری رێگای بەرگری لە میللەتەكەمان لە كوردستانی توركیا. وە دەبێ ئەو راستییەش لەبەرچاو بگرین، بێدەنگیمان دەبێتە هۆی پەرەسەندنی كوردقڕان لە كوردستانی ژێردەسەڵاتی توركەكان.