ئەوەندەى چیرۆكى كوردى لە ژێر كاریگەرییە دەرەكیەكاندا باڵە مەلەى كردووە ئەوەندە نەیتوانیوە بمانگەیەنێتە كەنارەكانى ئارامى و رزگار بوون لە خنكان
چوار شەممە, 22 شوبات 2012 00:51
گفتوگۆ لەگەڵ چیرۆكنووس:-- ئەرسەلان تۆفیق..
سازدانى:هێمن عوسمان عەبدوڵڵا..
ئەرسەلان تۆفیق لەبوارى چیرۆك نوسیندا ئەزمونى چەند ساڵەى هەیەو ژمارەیەك چیرۆكى لە رۆژنامەو گۆڤارە جۆراوجۆرەكانى كوردستاندا بڵاو كردۆتەوە و لە چەندین ڤیستیڤاڵى ناوچەیدا پلەى جۆراوجۆرى بەدەستهێناوە.
هەندێك لە چیرۆكەكانى كراونەتە بیرۆكەى شانۆگەرى و تەنها یەك چیرۆكی بەناوى(كیژۆڵەیەك لە نێوان دوو پیرە پیاوى شەست ساڵدا) كراوەتە كورتە فیلم و وا بڕیارە لە ڤیستیڤاڵێكدا نمایش بكرێت.
بۆ یەكەمجار لە چیرۆكى كوردیدا توانیویەتى ستایلێكى تایبەت بەخۆى دابهێنىَ كە گێڕانەوەى چیرۆكە واقیعیەكانى كوردستان بوو بە ناوى "چیرۆكەكانى دادگا" و تا ئێستاش زیاتر لە 60 دانەیان بڵاوكراونەتەوە.
شتێكى ئاساییە نوسەر دەكەوێتە ژێركاریگەرى نوسەرى دیكەوە، بەڵام ئەگەر دواى ئەزمونى ماوەیەكى درێژ نەیتوانى لەو كاریگەرییە بێتە دەرەوە، تا چەند كاریگەرى نەرێنى لەسەر تێكستى دەبێت، یاخود تا چەند ئەگاتە پلەى خۆدۆزینەوە.؟
ئەرسەلان تۆفیق: بەو پێیەى كە زانایانى كۆمەڵناسى دەڵێن مرۆڤ بونەوەرێكى كۆمەڵایەتیە، ناكرێت هیچ كەسێك لافى ئەوە لێبدات كە لەژێر كاریگەرى (ئەو) یان(ئەوان)ى تردا نەبێت. نوسەریش یەكەمجار لە چاولێگەرى و لە ژێر كاریگەرى و سێبەرى ئەو یان ئەوانى تردا خۆى دەبینێتەوەو دواى ئەزمونى تایبەتى و مێژویەكى كەم تا زۆر لەسەر پێى خۆى رادەوەستێت و دەبێتە خاوەنى خودى خۆى و دەق و تێكستەكانى لە دۆخى موتوربەكردنەوە دەگوازێتەوە بۆ دۆخى باڵگرتن و جۆرێك لە سەربەخۆیى بۆ خۆى دەستەبەر دەكات بە جۆرێك كە ڕەنگدانەوەى زۆر لەسەر شكڵ و ناوەرۆكەكەى بەجێدەهێڵێت و فۆرمێكى تایبەتى بە خۆى دەبەخشێت و تا دەگاتە ئەو رادەیەى كە ئەگەر ناویش لەسەر تێكستەكە نەبێت رەخنەگران و ئەوانەى كە بابەتێكى تریان خوێندوەتەوە بیناسنەوەو بیگەڕێننەوە بۆ خاوەنى خۆى.
ئەمەى من دەیڵێم دەرهاویشتەى ئەو پێناسەیەى ئەدەبە كە دەبێژێت(ئەدەب گەمە كردنە لەگەڵ وشەكان)، هەر بۆیە نوسەر بە شێوەیەك دەست و پەنجە لەگەڵ وشەكان نەرم دەكات كە جیاوازە لەوانى تر، ئەوەى ئێمە ئاماژەى پێدەكەین كەمینەیەكى زۆر كەمن و دەكرێت بڵێین تەنها ئەوانە دەگرێتەوە كە (ئەفڕاندن- ابداع) دەكەن. و لە هەر سەردەم و لەهەر پانتاییەكى جوگرافیدا ژمارەكان ئەوەندە كەمن كە لەنێو ئەوانى تردا بە زەقى دیارن و یەكێكیش لە سیفاتەكانى ئەو كەسانە ئەوەیە لە(شوێنكات- زمكان)ى خۆیدا هەمیشە دژایەتى كراون و بە جۆرێك لە جۆرەكان تۆمەتباركراون و بە لادەر و تێكدەرو جۆرەها ناوناتۆرە لەكەدار كراون، بەڵام دواجار نەوەكانى داهاتوو هاتون و شایەتى ئەوەیان بۆ داون كە ئەوكەسانە داهێنەرن و لەكات و ساتى خۆیاندا بەهاوتواناى ئەوان دەرك نەكراوە... ئەوە ئەوانى خوێنەر و رەخنەگربوون كە نەیانتوانیوە وەك پێویست دەركى داهێنەران بكەن نەك كەموكورتى و دەستكۆتایى داهێنەران.
با لێرەوە بگەڕێمەوە سەر وەڵامى پرسیارەكەو بڵێم:
ئەوەى كەناتوانیت (ستایل- شێواز)ێكى تایبەت بە خۆى پەیڕەو بكات و بۆ هەتا هەتایە لە ژێر كەپرو ساباتى ئەوانى تردا دەیگوزەرێنآ و پێشمان دەڵێت من داهێنەرو ئەفڕِێنەرو چى و چیم... ئەوە بێگومان هەرزو بەدیار دەكەون و دەستەكەیان كەشف دەبێت، ئەوانەشیان كە هەر زۆر روو قایم و نادەربایسن، دێن و ئەو بەرهەمانەمان بۆ دەگوازنەوە كە (بەخەڵەفاویى) وادەزانن دەستى خەڵكى ترى پێناگات، ئیتر یان لە ژێر ئیلهام و سایەى راستەوخۆى ئەوانى تردا كار دەكات یان دەقى تەرجەمەكراوى ئەوانى تر دەبێت كە ئەمەیان عەیبەیەكە بۆ هەتا هەتایە لەكۆڵى خاوەنەكەى نابێتەوە. نمونەى زۆریشمان لە مێژوى كۆن و نوێى ئەدەبى كوردیدا هەیە و لێرەدا ناتوانین بچینە نێو ئەو مەودایەوە چونكە ئامانجى ئەم كارەى ئێستەى ئێمە نیە.
ئایا دەكرێت چیرۆك پێشبینى هەندێك دەرئەنجامى زانستى یان مرۆیى بكات؟
لەوەڵامى ئەم پرسیارەدا پێمخۆشە بە دوو ئاراستە قسە بكەم:
لە ئاراستەى یەكەمدا ئەوەى كە ڕویداوەو چیرۆكنوس تەنها ئەركى گێڕانەوەیە، بەڵام خۆ ئێمە ئەوەش دەزانین كە گێڕانەوەكان شێوەو شكڵ و ناوەرۆكى جۆراو جۆریان هەیەو تەنانەت لە نێو چیرۆكیشدا (كە یەكێكە لە ژانرە ئەدەبیەكان) شێوازى زۆرمان هەیەو لە (مایكرۆ چیرۆك)ەوە بگرە تادەگاتە(رۆمان)، لەسەردەمە كۆنەكانیشدا حیكایەتەكانى بەر ئاگردان و نوسینەوەو خوێندنەوەى ئەفسانە زۆر زەوەندەكان هەر بە گێڕانەوە تۆماركراوە... ئەم ئاراستەیە ئیشى گێڕانەوەیەكى هونەرى و فەنتازییە و جیاوازە لە گێڕانەوەكانى تر كە زۆرینەى خەڵك لەسەرى راهاتوون.
هەرچى ئاراستەى دووەمیشە لەئەنجامى قوڵبونەوەو شۆڕبونەوە بەنێو بابەتێكى دیاریكراوى هەڵبژێرراوى نوسەردا كارەكانى دەكات و دواجار دەردەكەوێت كە چەندە پێشبینیەكان راست و رەوانن و چەندەش وا دەرناچێت، چونكە خودى پێشبینیەكان قابیلى ئەوەن كە هەندێكیان راست بن و هەندێكیشیان راست دەرنەچن... زۆریشن ئەوانەى كە پێشبینیان كردووەو دەقاودەقیش وەك خۆیان هاتونەتە دى و هەندێكى تریشیان بە پێچەوانەوە.. دەكرێت چیرۆكنوسیش بەشێك بن لەو پێشبینیكارانەو دەر ئەنجامەكانیش هەر بەشێك بن لە دەرئەنجامەكانى ئەوان. ئیتر ئەو پێشبینیانە مرۆیى بن یان زانستى هەرچەندە من تێبینیم هەیە لەسەر ئەوەى كە بەڕێزتان بابەتە زانستیەكان و مرۆییەكانتان پەرت كردووەو بە جیاواز پرسیارتان لەبارەوە كردووە.
پێتوایە كورد كۆمەڵێك كەرەستەى باشى هەیە وەك"ئەفسانەى كوردى، روداوەكانى مێژوى كورد...و هتد" لە لایەن چیرۆكنوس و رۆمان نوسەكانەوە بەكار نەهێنراون؟
ئەرسەلان توفیق: هەرچەندە مێژوى چیرۆكى كوردى وەكو ساڵ مێژویەكى دوور ودرێژە، بەڵام لە روى پراكتیزەوە نەتوانراوە بەئەندازەى باڵاى ئەو مێژووە بەرهەممان هەبێت، ئاخر ئەوەندەى چیرۆكى كوردى لە ژێر كاریگەرییە دەرەكیەكاندا باڵەمەلەى كردووە ئەوەندە نەیتوانیوە بمانگەیەنێتە كەنارەكانى ئارامى و رزگار بوون لە خنكان، ئەوەندە خەریكى راكردن بووە بەدواى لاسایى كردنەوەى نەتەوەو زمانەكانى تر، نیو ئەوەندە سەریرى خۆى و پێگەى خۆى خۆى و پێداویستیەكانى خۆى نەكردووە، من پێموایە كە چیرۆكى كوردى "بەتایبەتى لەم ساڵانەى دوایدا" گەورەترین كەرەستەى لەبەردەستدابووە بەڵام بەداخەوە كارەسات و روداوە جۆراوجۆرەكان كەمترین كاریگەرییان لەسەر فەزاى چیرۆك جێهێڵاوە، خۆ ئەگەر هەمان شت بەراورد بكەین لەگەڵ ژانرێكى ترى ئەدەبى وەك (شیعر) ئەوا بێگومان فەزاى چیرۆك لە بەراوردى شیعردا دەچێتە ریزى نەبوان. هەر بۆ نمونە لە نێو كارەساتى "ئەنفال" و "هەڵەبجە"و" پاكتاوى رەگەزى" و هەموو بابەتە نەتەوەیى و نیشتیمانى و مرۆییانەى كەبەسەرمان هاتووە دەكرێت تەنها یەك گرتە ببێتەمایەى چیرۆك یان هەر ژانرێكى ترى ئەدەبى تا بەڕۆمانیش دەگات، وە هەموو ئەوانە كەرەستەى زۆر باشن بەڵام بە داخەوە شتێكى ئەوتۆمان بۆ نەكردوون، من بۆ خۆم لەو بابەتانە تەنها چەند دانەیەكم بینیوە.
ئیتر با هەموو ئەو چیرۆكە ئەفسانەییانە بوەستن كە دوور نیە لەچەند ساڵێكى تردا بە تەواوەتى لە نێو بچن، ئەوەشمان بیرنەچێت كە ئەفسانەكان بەشێكن لە مێژووى هەر نەتەوەیەك و ئەگەر نەتەوەیەكیش ئەفسانەى نەبوو بێگومان یەكێك لە پایەكانى نەتەوە بوونى لەنگ دەبێت. بەداخەوە عەقڵیەتى ئێمە وایە كە ئەگەر یەكێك لەو بوارەشدا كاربكات بە چاوێكى تر و بە دیدێكى ترەوە نەك لە بەرهەمەكەى بگرە لە خۆیشى دەڕوانین.. كە ئەم بیركردنەوەیە بەبڕواى من پێداچوونەوەى پێویستە.
لەئێستادا هەموو كەس لە دوای نوسینی تێكستێك (چیرۆك)، پێ ی دەڵێن چیرۆكنوس، پێت وایە ئەگەر ڕەخنەگرمان هەبێت ئەوا هەمووكەسێك ناتوانێت بەسادەیی ببێت بە چیرۆكنوس ...ئایا تاچەند پێویستمان بە ڕەخنەگرهەیە تا چیرۆكنوسی راستەقینە و جددی لەو كەسانە جیابكەینەوە كەوەك حەزێك و نەزیاتر پیشەكەیان گرتووە؟
ئەرسەلان توَفیق : مەرج نیە هەركەس بەرهەمى زۆر بوو ئیتر ببێتە چیرۆكنوس و هەركەسیش كەم بەرهەم بوو ئیتر چیرۆكنوس نەبێت، ژمارە مەرج نیە، بەڵكو مەرج تەنها جێكردنەوەو دیاریكردنى پێگەى خۆیەتى لە نێو فەزاى ژانرێكى ئەدەبیدا، راستە رەخنەگر یەكێكە لەو فلتەرانەى كە دەبێت هەموو دەقێكى پێدا تێپەڕبكات و حەقیشە هەموو دەقێك بدرێت لە تەتەڵەو بێژى رەخنەگران، بەڵام ئەگەر كاتێك رەخنەگران بە ئەركى خۆیان هەڵنەسان دەبێت لە دەرگاى كێى تر بدرێت بۆ ئەوەى لەو پشێوى و فەوزایەى ئێستا تێكەوتوین دەربازمان ببێت؟ دیاریشە مەبەستم ئەو رەخنەگرانە نیە كە بنەماى كاركردنیان لەسەر هاوڕێیەتى و ناسین و راسپاردنە، بەڵكو مەبەستم رەخنەگرى جیدى و پرۆفیشناڵە.
وەك هەموانیش دەزانن رەخنەكردن بەماناى لەناوبردن و تەفروتوناو حەیابردنى دەق یان نوسەر نیە، بەڵكو دیاریكردنى هەموو لایەنە باش و خراپەكان و جوان وناشیرینەكانى دەقێكەو ئامانجى سەرەكیش پەرەپێدانى تواناى نوسەر و گەشكردنەوەى لایەنەباشەكان و كەمكردنەوەى لایەنە خراپەكانى ئەو دەقەیە، دەمێكیشە گوتراوە كە جیاوازى زۆر هەیە لە نێوان(چەقۆى قەساب)و (نەشتەرى پزیشك)دا، چونكە چەقۆى قەساب بۆ پارچەپارچەكردن و داهێنانى جەستەى بەردەستەكەیەو نەشتەرى پزیشكەكانیش بۆ دۆزینەوەى نەخۆشیەكان و بڕینى پارچە زیادەكانە، كەواتە لێرەوە ئێمە دەتوانین باس لەوە بكەین رەخنەگرانى ئێمە لە چ پێڕێكى ئەو دوو دەستەیەن و ئەو كارەشیان دەیەن دەچێتە نێو ریزبەندى كام خانەیان؟ ئەوەیان ئێوە حەكەم بن.
لە چیرۆكدا ئەگەر بێت و خەیاڵ وەزیفەی خۆی نەبێـت، ئایا چاوەڕوانی داهێنانی لێدەكرێت، یان گەر رونتر پرسیارەكە بكەین: ئەگەر بێت و زمانی ئەفسانەو ئەندێشەگەرایی لە نێودەقدا ئەركی خۆی نەبێنێت ئەو تێكستە نابێتە كۆمەڵە رستەیەك كە بنچینەكەی دەگەرێتەوە بۆ وڕێنەكاری؟
ئەرسەلان توَفیق : خەیاڵ یەكێكە لە رەگەزە سەرەكیەكانى چیرۆك بەڵام هەموو شتێك نیە، نابێت ئەوەش لەیاد بكەین كە لە دونیاى خەیاڵدا هەموو شتەكان جوانتر و ڕەنگاڵەیى تر دەردەكەون. رەنگەكان، دەنگەكان، مامەڵەو خۆشەویستى رق لێبونەوەكان، هەر لەنێو دنیاى خەیاڵدا جوانترو بەرجەستەترن... هەر بۆیە یەكێكە لە بنەما سەرەكیەكانى دونیاى چیرۆك، دابڕینى ئەو بنەمایە دەبێتە هۆى لەنگ بوون و دەركەوتنى كەموكورتى و دواتر لە بوارى چیرۆك دەردەچێت و لەوانەیە ناویكى ترى لێبنرێت نەك
"چیرۆك" هەرچى ناوێكیش بێت گرنگ نیە، بەڵكو گرنگ ئەوەیە لە نێو حەوشى چیرۆكدا جێگەیەكمان نیە ناوى غیاب و ئامادەنەبوونى خەیاڵ بێت.
بیرمان نەچێت، (وڕێنە) جۆرێكە لە چیرۆك و تەنانەت دەچێتە نێو چیرۆكە سەردەمیەكان و لەو بوارەشدا من بۆخۆم ئەزمونێكم هەیە، وڕێنە بە مانا خراپ و ناباشەكان واتە نەچونەوە سەریەكى بابەتەكان و تێنەگەیشتن لەكۆى ئەو پەرەگرافانەى لە لایەن نوسەرەوە پێشكەش دەكرێن، بەڵام وڕێنە ئەگەر وەك كەرەستەیەكى هونەرى بەكارهێنرا و هەندێك جوانكارى تێداكرا بێگومان دەبێتە یەكێك لە كەرەستە زۆر باشەكانى چیرۆك...
ئەگەر بەراوردێك بكەین و چاوێك بە چیرۆكی ساڵانی حەفتا و هەشتاكان بگێڕین و دواتریش دوای راپەرین و هەروەها دوای ئەم دەساڵەی ڕابردوو دەبینی گۆڕانكاری لە ئەدەبى كوردیدا كۆمەڵێك ئاماژەو دەلالەتى نوآ هاتۆتە كایەوە لە فەزاى چیرۆكدا، ئایا بەڕاى تۆ ئەم بارگۆڕانە دەرئەنجامى گۆڕانى كۆمەڵگەیە، یان گۆڕانكارى ئەدەبیە و پەیوەندى بە گۆڕانى كۆمەڵگەوە نیە؟ یاخود پەیوەندیدارە بە بە هەردوو فاكتەرەكەوە؟
ئەرسەلان توَفیق: ئەدەب بەشێوەیەكى گشتى لەبەر ئەوەى لەنێو خولگەى كۆمەڵایەتى مرۆڤەكاندا دەسوڕێتەوەو بە جۆرێك لە جۆرەكان پەیوەندى راستەوخۆى كۆمەڵایەتى هەیەو ناتوانین لە فەزا كۆمەڵایەتیەكەى داببڕین و لەنێو كاریگەرییەكانیشدا رۆڵى بەرچاوى خۆى هەیەو دەشتوانین لەو بوارەشدا ئاماژە بەهەمو ئەو شۆڕشانە بدەین كە لە ڕێگەى ژانرێكى ئەدەبیەوە بەرپاكراوەو دیارترینیشیان شۆڕشى فەرەنسییە كە بەشێكى سەرەكى پەیوەندى بەو شیعرە حەماسیانەوە هەبوە كە شاعیرە شۆڕشگێرەكان ئاراستەى شەقامى خرۆشاوى دژ بە پادشاییان كردوەو دواتر ئەو سەركەوتنە گەورەیەیان تۆماركردو شۆڕشى كوردیش دیارە تا كوآ لە ژێر كاریگەرى شیعرە حەماسیەكانى سەردەمى شاخدا بووە، هەروەها زۆرینەى ئەو وڵاتانەى كە سەردەمانێك لەژێر ركێفى داگیركەراندا بوون ژانرە ئەدەبیەكانیان كردۆتە سەكۆیەكى بەرفراوانى روو بەڕوو بونەوەو موقاوەمەت، هۆكارى ئەمەش بۆ ئەوە دەگەڕێتەوە كە ئەدەب كاریگەرى زۆرى هەیەو لە هەرشتێكى تر كاریگەریەكەى زۆرترە. سەردەمەكانى پێش راپەڕین جۆرە ئەدەبێك كارى پێدەكرا كە لەگەڵ دواى راپەڕین گەلێك جیاوازییان هەبوو، كە من پێم وایە سیاسەت و دەسەڵاتى سیاسى دەكەوێتە ژێركاریگەرى ئەدەب و ئەدەبیش لە كاریگەرى سیاسەت و سیاسیەكان لە هیچ سەردەمانێكدا بەدەر نابێت.
بە دیوێكى تریشدا دەكرێت بڵێین كەهەندێك جاران ئەدەب توانیویەتى رێچكەیەكى تایبەتى بەخۆى بگرێت و كاریگەرى تەواوەتى لەسەر كۆمەڵگە دابنێت و پێناسەى چەمكەكان سەرلەنوآ دابڕژێتەوەو رۆحێكى تر بكاتەوە بەبەرى هاوڵاتیاندا... مەگەر تا هەنوكەش ئەوانەى كە شیعرەكانى سەردەمى شاخ و لایلایەكانى حەمە جەزاى رەحمەتى گوآ لێبوبێت بیرى چوەتەوە؟ مەگەر شیعرە حەماسیەكانى نەتەوەكەمان لە خەیاڵى ئەو نەوەیە دەردەچێت كە رۆژێك لە رۆژان چەوساندنەوەى نەتەوەیى و نیشتیمانى بینیبێت؟
هەر بۆیە بە بڕواى من كاریگەریەكە دوو سەرەو كارلەیەك كردنەو لەو نێوەندەشدا دەكرێت لەشوێنێك بۆ یەكێكى تر و لە كاتێكەوە یۆ یەكێكى تر رێژەكەشیان زیاد و كەم بكات.
نوسین لە تاراوگە دەتوانێت بە جۆرێك لە جۆرەكان لەگەڵ ئەدەب و زمان و فەرهەنگى ئەو نیشتیمانە مەنفیەى ئەو نوسەرە تیایدا نامۆیە، دەتوانێت داهێنانێكى نوآ بكات و بارگاوى نەبێت بەو فەرهەنگەى ئەو نوسەرەى تێدا دەژى، واتە شتەكانى ئەوێمانپێنەفرۆشێتەوە،بە جۆرێك لە جۆرەكان هەوڵێك بێت بۆ داهێنان بۆ نیشتیمانەكەى خۆى؟ یاخود ئەمە دەبێت چۆن مامەڵەى لەگەڵدا بكرێت، هەڵبەت وەك چیرۆكنوسێك كە هەنوكە لە تاراوگە ژیان ناگوزەرێنى؟
ئەرسەلان توَفیق: نامۆبوون و ژیانى تاراوگە ئەزمونێكى گەورەیە بۆ ئەو كەسانەى كە لەبوارى ئەدەبیدا كار دەكەن تا هەستى نیشتیمان و نەتەوەو سۆزى هاوڕآ و هاوسۆزەكانى بكاتە بیانویەك و لەو ڕێگەیەوە خۆى خاڵى بكاتەوەو ڕەنگى خەیاڵ و ژیانى غوربەتى خۆى بنەخشێنێت، دەكرێت غوربەت و نامۆبون ببنە پێشەنگى داهێنانەكان و پیاچونەوەى هەموو چەمك و پێناسە باوەكان بێت و بە جۆرێكى تر و لە گۆشە نیگایەكى ترەوە لە هەمویان بڕوانێت و بۆ هەر یەكێك لەوانەش پێناسەیەكى تر و مانایەكى تریان پێببەخشێت، مەسەلەى غوربەت و دابڕان دەمێكە ئەدیبان و ڕەخنەگرانى ئەو بوارەى سەرقاڵكردووەو تەنانەت عاریف و خودا ناسانیشى مۆڵداوەو لەنێو چەمكەكانى(هەجر و وەێل) دا قسەیان لەسەر كردووە، ئەوەتا حەزرەتى مەحوى مەزن دەفەرموێت(تێدەگا هەركەس بكا فەهمى رموزى مەعنەوى- هەجر و وەێڵە نار و جەننەى ئایەتى لایستوى).
لە ڕاستیدا من پێم وایە ئەم دیاردەیە ناكرێت گشتگیر بكرێت و وەك پێوەرێكى گشتى قسەى لەسەر بكەین، چونكە هەندێك جاران غوربەت و دابڕان بڕست لە خاوەنەكەى دەبڕێت و هەناسەى دەچنێت و هیچى پێوەناهێڵێت و هەندێك جارانیش پێچەوانەكەى ڕاستە. خۆشمان دەزانین لەوانەیە یەك ڕوداو بۆ چەند كەسێك نەبێتە هۆى دەربڕینى یەك جۆرە پەرچەكردار.
من بۆخۆم لە غوربەتدا دەستم بەكارەكانم كردوەو ڕەنگدانەوەى تەواوەتى ئەو ستایلە لە ئەوەڵەوە تا ئێستاش بە نوسینەكانمەوە دیارەو نایشى شارمەوە كە هەستى خۆشەویستى نیشتیمانى ئەوەندە پێچەشتووم كە هیچ جۆرە گەندەڵى و خراپەكارییەكى هاونیشتیمانیەكانم ناكاتە ئەوەى ئەو خۆشەویستیەم بیر بباتەوە، چونكە من ئەزمونى دابڕانم كردو بۆ ماوەى چوار ساڵ لە خوا دەپاڕامەوە شەوێك نیشتیمانەكەم بێنێتە خەوم و رۆحم ئاسودە بكات. بەڵام خودا ئەو دوعایەشى لىَ قبوڵ نەكردم، ئیتر نازانم بۆ ئەوە بوو كە هەمیشە ئاتاجى بم یان ئەوەبوو كە بمكاتە كەسێكى نیشتیمان پەروەر؟ هەركامێكیشیان بێت من هەر سوپاسى خوا دەكەم.