مژدێن" دەمەوێ گرفتی دەرونی سیاسیە كوردو توركەكان چارەسەر بكەم!"
پێنج شەممە, 27 تشرینی یەکەم 2011 10:35
گفتوگۆی: ئەرسەلان مەحمود ..
ئەرسەلان مەحمود: ئەگەرچی مرۆ تەنێ بەخود ناسین و، ناساندنی خۆی، ناتوانێ دواجار وەك ئەوەی پێویستە ڕۆبچێتە ناو قوڵایی خودییەوە، چونكێ ئەمە پرۆسەیەكی زۆر ئەستەمە، سەرەڕاش دەمەوێ بپرسم زۆرینەی خەڵك، یا بابڵێم هەوادارو، گوێگرانی گۆرانییەكانتان، هێشتا نازانن مژدێن كێییە؟، یانی ناوی تەواوی چییە؟، لەكوێ لەدایكبووە؟، مناڵی و، قۆناغەكانی هەرزەكاری لەچدۆخ و، ژیانێكی خێزانی و، كۆمەڵایەتی .... هتد، دا، بەرێكردوە؟، ئایا وڵامی وەها كۆپرسێك بۆ نەبوونەتە جێگەی گرینگی پێدانی ئێوە؟، ئەم نائاساییبوونەتان بۆچی دەگەڕێننەوە؟..
مژدێن: مرۆڤ ئەگەر دەرونناسی خوێندبێتەوە وەك چۆن 14 ساڵ خوێندنەوەم تێدا كردوە ئەتوانێ و ئەگاتە قوڵایی ناخی، ئەوە بۆ كەسانی نەشارەزایە لەبواری دەرونناسی كە نەتوانن بگەنە ناخی خۆیان.
زۆر جار ئەم پرسیارە سەرەتاییانەم لێ كراوەو وەڵامم ئەوەندە داوەتەوە بێزارم كێ و لەكوێ لەدایكبووم بەڵام بەچاوان بۆ تۆو جەماوەری نوسینی تۆی دوبارە دەكەمەوە:
مژدێن ناوی راستی و هونەریم، دینا ناوی جنسیەی هۆڵندیم، ناوی بابە پێم باشە لەمەودوا ئاشكرای نەكەم چونكە كارێكی بوێرانەم كردوە دەمەوێ رەخنە بێتە تەنها سەر شانی خۆم، كەی گەیشتمە پلەی جیهانی ناوی ئاشكرا دەكەم. لەكوردستان لەدایكبووم و 14 ساڵ لەهەمان وڵات ژیانم بەرێكردوە. مناڵیم زۆر جیاواز بووە زەنگین بووە چیم ویستبێت هاتۆتە بەردەستم هەموو هاوینێك پشوومان لەبەغداد بوو ئەیانبردم بۆ باخچەی ئاژەڵان و یاریگەی گەورە. هەرزەكاریم لەهۆڵندا زیاتر ژیاوم لە14 ساڵییەوە لەم وڵاتەم بەڵام تەمەنی ئاسایی هەرزەكار نەژیاوم دڵداری و ئەو بابەتانەم نەبوو هەر لەم خوێندن چوومەتە ئەو خوێندن هەر چەند لەهیچ بابەتێك بەغەیری هونەر خۆمم نەبینییەوە بەڵام سودم لەخوێندنەكان وەرگرتووە، یەكەم هەنگاوی خوێندن ناسینی زمانە هەتا خۆت بەو وڵاتە بناسێنی پێویستە باوەرت بەخۆت پتەو بێت ئەمەش بەزانینی زمانەكەیان دەكرێت بڕوانامەی زمانی هۆڵندیم هێناوە، لەدوای تەواوكردنی ناوەندی لەكوردستان، لەهۆڵندا لەبری 3 ساڵ بەساڵ و نیوێك Institute معهدم بەشی پسپۆری جوانكاری تەواو كرد، لەهەمان كاتدا (vocal) واتە دەنگم ستایلی R&B خوێندووە كە هونەرمەندە جیهانییەكان تێیدا دەخوێنن لەگەڵ 6 مانگ پیانۆ. ساڵكیش كۆمپیوتەرم لەزانكۆ خوێندووە، بەڵام لەبەر ئەوەی بوارێكی پیاوانە بوو لام وازم لێهێنا، ئێستا parfum واتە بون دەخوێنم لەزانكۆی ئەمستردام.
نائاسایی بوونی من ئەگەرێتەوە بۆ نائاسایی پەروەردە كردنم كەپڕ بەها بووە لەسۆزو گرینگیپێدان و باوەر بەخۆ دروستكردن هەر بۆیە كەسێكی بوێرم و خۆم بەكەسێكی دوبارە نابینم.
ئەرسەلان مەحمود: گۆرانی وتن، چییە؟.. ئەمە وەك هەر شتێكی تری پەیوەست بەبوونی مرۆڤ، بەشێكە لەو بوونە؟، یا گوتنەوەیەكی دوبارەی بوونێكە لەدەرەوەی مرۆڤ؟.. هەر بەراست تێكستێكی دەنگییە لەئاوازدا، یا تێكستێكی زمانەوانی؟..
مژدێن: گۆرانی وتن: هەرچەندە لەئەوروپا گەورە بووم بەڵام باوەرم هەمان باوەری ئەمان نییە لەم بوارە كە ئەڵێن خوێندنە، من ئەڵێم بەهریەكی سروشتی دەنگە پاشان خوێندن و ناسینی دەنگی خۆت و زمان و دەنگەكانی میوزیك و ناسینی بناغەی هونەری وڵاتەكەی خۆت پێش هەموو شتێك واتە فۆلكلۆر دەبێ بناسی پاشان دەتوانی كاری نوێ بكەی ئەگەرنا دەكرێت كارەكەت دوبارە بێ و لەكارێكی كۆن بچێت كە وتراوە، بۆیە دەبێ كەسێكی زانا بی و رۆشنبیرانە بگەرێی بەدوای زانیاری و دروستكردنی كەسایەتییەكی هونەری كە دەبێتە ناسنامەت.
بێگومان مرۆڤ بوونی نەبێ دەنگ بوونی نابێ هەموو ئەو تەكنۆلۆجیەی ئەیبنی لەسەر دەنگە ئەسڵییەكە نوێگەری دەكەن، دەكرێ دەنگ دەرونی بێت و پێناسەی ناخ ئەمە شیكاری دەنگە لای من نەك تەنها تێكستێكی زمانەوانی چونكە ئەگەر ئەمەی دووەمیان بێت واتە قسەكردنێكی ئاسایی كە وەك هونەری گۆرانی وتن بەهونەر دانانری!
ئەرسەلان مەحمود: ئەگەر بۆ مژدێن، گۆرانی وتن هەوڵێكبێ بۆ خۆ ئازادكردن لەگوشارێكی دیاریكراوی دەرونی، یا فكری، یا هەڵوێستێكی مرۆیی، ئەو فۆڕمە كامەیە دواجار ئێوە بتانەوێ شیعرو هۆنینەوەی تیادا بگوازنەوە فەزایەكی تری پڕ لەجوڵەو، بەمانا تر؟..
مژدێن: جەنابت هەڵەی لەوەی ئەگەر من ببینی هەوڵبدەم بەگۆرانی وتن هیچ هەوڵێكم نییە بۆ ئازاد بوون چونكە من ئازادم و لەوڵاتێك ئەژیم دەنگی من دەنگی خانمی سەرۆكە واتە رێز لەمافی مرڤ دەگیرێ، و گرفتێكی دەرونیشم هەبووبێ بەهۆی خۆشەویستی چوومەتە لای دەرونناس چونكە رۆشنبیرم ئەم لایەنە بەكەم لەقەڵەم نادەم وەك نەخوێندەوارەكانی كۆمەڵگەی تۆ كە ئەگەر سەردانی ئەم نەخۆشخانەیە بكەن وا دەزانن شێتن! پێمخۆشە خۆیان سەربەست بكەن لەقسەلۆكی خەڵك و هەر گرفتێكیان هەبوو داوای چارەسەری باوەرپێكراو بۆ رزگار بوون.
هونەری من باوەرپێكراوە واتە Proffesionel هونەر ئەكەم بەهرەی دەنگم هەیە بیری رۆشنبیرانەم هەیە گۆرانی لەتێكست و میلۆدی و چیرۆكی كلیپی پێ دەنووسم و دەیكەمە گۆرانییەكی باوەرپێكراو ئەگەرچی هونەری كورد هەتا ئێستاش باوەرپێكراو نییە لەجیهان بۆیە تەنها هەوڵم لەهونەر ئەوەیە هونەری كوردی بەجیهانی بكەم و بێگومان دەنگی خۆشم بەجیهان بناسێنم، بەڵام ئەگەر بڵێی هەڵوێستی مرۆیی بەنوێگەری نابینم چونكە ئەوەی مرۆڤ بێت ئەبێ لەپێناوی مرۆڤایەتی كار بكات و بڵێ پەیامیشم مرۆڤایەتی و یەكبوونە ئاشتكردنەوەیە ئەو قەومانەی كەدان بەبوونی یەكتردا نانێن و هەر لەرەخنەو یەكتر كوژیدان. واتە دەمەوێ بەهۆی میوزیك قەومەكانی جیهان كۆبكەمەوە.
ئەرسەلان مەحمود: ئازادی، بەلای شۆرشگێرێكەوە، لەوەیە دواجار تەنێ بریتیبێ لەچەسپاندنی خود، بەڵام لای رۆناكبیرو، هونەرمەندانێك، ئازادی مەیلێكی بوونگەرایی هەیە، ئەو خولیا قوڵانەی مژدێن بەرەو وەها فەزایەك دەهەژێنن، لەچیدا چڕ دەبنەوە؟..
مژدێن: خولیاكانی من سەربەستی بێ سنورە كە لەجیهانێك هەمووی سنورە تاڕادەیەك بەرجەستەی دەكەم بەهۆی باوەڕی خۆم كە هەموو قەیدو سنورەكان ئەشكێنم هەتا بگەمە ئەو پلەیەی كەپێی ئەڵێن داهێنان چونكە بەباوەڕی كەسانێك كارێكی داهێنەرانەم كردبێت بەباوەڕی خۆم دەبێ پێی بگەم و لەهەنگاونان دام.
خولیایەكی تری من ئەوەیە بەكوردی لەسەر تەختەی مەسرەحی جیهانی گۆرانی بڵێم و لەداهاتوو بەزمانی كوردی گۆرانییەكەم لەگەڵ بڵێنەوە كەئەبێتە ناساندنی هونەری كورد بەجیهان و باوەر بەهونەری كوردیكردن بەڵام ئەبێ لەئێستاوە كوالێتی باش بكەن چونكە چۆنایەتی كارەكان ئاستەكەی نزمە كارەكان پەخشیان قبوڵ ناكرێ لەتیڤییەكی جیهانی وەك Mtv . كەناڵی میوزیك.
ئەرسەلان مەحمود: لەناو زۆرێك لەسیستەمە سیاسیەكان، هێشتا گۆرانی و، سرود، كەرەستەیەكی گەورەو گرانی ئایدۆلۆژی بەرجەستەكاری توندوتێژی و، زێدەڕۆێن، ئێوە چیتان سەبارەت بەوەها دنیابینییەكی رێكخراو هەیە بۆ وتن؟
مژدێن: هونەر سیاسەتە لەسیاسەتیش زیاتر دەنگی دەروات چونكە تەمەنێكی دیاریكراوی بۆ نییە مناڵ هەتا پیر گوێی لێدەگرێ ئاگاداریەتی دەیبینێ، بەڵام سیاسەت تەمەنی دیاریكراوە لەگەڵ رێزم بۆ سیاسەتمەداران كەخۆم بەكەسایەتییەكی هونەری سیاسیش دەبینم! ئەگەر پێمبكرێ گرفتی دەرونی سیاسی كوردو تورك چارەسەر دەكەم، لەهەوڵدام!
ئەرسەلان مەحمود: ئەوەنەی تیبینیكراوە، ئێوە وەك خانمێكی گۆرانیبێژ، خاوەن بوونێكی یاخی لەداب و نەرێتە باوەكانن، ناكۆكن لەگەڵ ئەو كولتورو نەرێتانەی بوونەدەستە جەمعییەكەی كورد مافی تێكشكاندنیانی نەداوە بەكەس، ئایا ئەو هێزە ناخەكییەی مژدێن لەروتكردنەوەی جەستەو، خۆ خاڵیكردنەوە دەرونیەدا، دواجار بۆ بەرجەستەكردنی چییە؟
مژدێن: بۆ پیشاندانی ناڕەزایی بۆ داب و نەرێتە لەگەڵ سەردەم نەرەخساوەكان و شكاندنی ئەو سنورە بەكاربۆكردن نەك بەس قسەكردن كە كورد زۆر هەژارە لەخوێندنەوە دەیان نوسینی بۆ بنووسە وێنەكەت پێش بیرت ئەبینی!
تایبەت بەماڵپەری پێنوسەكان، هەر ناوەندێكی بڵاوكردنەوە لەجارێكی دی بڵاوكردنەوەی ئەم گفتوگۆیەدا، دوای ئاماژە بەسەرچاوە، مافی بڵاوكردنەوەی دەبێ، تكایە.