ژیان لەسەر خێر ونەهامەتیەكانی چەك
یەک شەممە, 19 شوبات 2012 21:01
یاد علی _ رانیە..
لەم سەردەمی زانست وعەولەمەدا، زۆربەی وڵاتە دواكەوتووەكان وێرانی چەكە جۆربەجۆرەكانن، پانتایەكن بۆ تاقی كردنەوەی جۆرەها چەك، بەتایبەت وڵاتانی رۆژهەڵاتی ناوەڕاست، ئەگەر ئێمە قسە لەسەر ئێراق بكەین بە باشوری كوردستانیشەوە، ئەبینین مێژوویەكی تەواو پێچەوانەی ئێستایان هەیە، شارستانیەتەكان مێژوویەكی كۆنی هەیە، لەگەڵ ئەوەی سەردەمێك ئەو ئەم هەرێمە مەڵبەندی رۆشنبیری وزانست وپێشكەوتن بووە، بەڵام ئێستا بۆتە وڵاتی مەرگ وبێوەژن وهەتیوو، مەملەكەتی بێهیوایی وژیان لە ژێر دوكەڵی چەك وبارووت وپیلانی دوژمنان، تا ئێستا چ جۆرە چەك وپیلانێكی سەربازی ماوە تێیدا بەكار نەهێندرابێت؟!
لێرەوە هەندێك پرسیار هەن كە ئەبێت تاكی ساویلكەی وڵاتانی دواكەوتوو دایم لە خۆی بكات، هەرچەندە ئەو پرسیارانە زۆرجار خۆیان دێنە پێشەوە وبەشێوەیەكی ئۆتۆماتیكی ئەوروژێن، لەوانە؛
بۆچی زۆرێك لە وڵاتانی جیهانی یەكەم، وڵاتە ئاشتی خوازەكان بودجە وژیانیان لەسەر خێر وپارەی ئچەكانەیە كە رۆژانە ئێمە دژی یەكدی بەكاری ئەهێنین؟!............ ئهو خاڵه ڕهشانهی وێنهکه بنکه سهربازیهکانی ئهمریکان لهو ناوچهیه
بۆچی ئێمە لەم وڵاتانەدا كە ئەرز وئاسمانی خێروبێرە، دایم چاومان لە بەدەست هێنانی مافە لەو وڵاتانە وەكو كرێكارێكی هەرە سادە، بۆ ژیان لەوێ پڕە لە رەفاهیەت ولیرە بۆتە سێبەری مەرگ ومردن؟!
بۆ سنوری ئەو وڵاتانە بە هێمایەكی زۆر سادە لەیەكدی جیاكراونەتەوە وسنورەكانی ئێمەش بە تۆپ ودەبابە وسەرباز تەندراون؟!
چ هۆكارێكە ئێمە وئەوانی بەو ئاقارەدا بردووە؟!
زیاد لە هۆكارەكانی دیكە، تاكە هۆكار كە كاریگەری راستەوخۆی گەورەی هەیە بەسەر كۆی ئەو قەیران وبارودۆخانە، بریتیە لە هۆشیاری تاكەكان، چونكە ناهۆشیاری تاك وای كردووە كە نوخبەیەكی داردەستی نا ئەكادیمی بكاتە كەڵەگا بەسەر كۆمەڵگاوە، ئەو نوخبەیەش لە دوو لاوە مانەوەی خۆیان ئەپارێزن؛
یەكەمیان: مانەوەی خەڵك لەو ئاستە نزمەی هۆشیاری بە هەموو لقەكانیەوە.
دووەمیان: بوونی خۆیان ئەخەنە خزمەت مەسڵەحەتی وڵاتە زلهێزەكان، بەتایبەت ئەمریكا وهەندێك لە هاوپەیمانەكانی، هەندێك جاریش دووڕووانە ئەبنە مقاش بەدەست زۆربەی ئەو وڵاتانەی كە بەرژەوەندیەكانیان فراوانە لەناوچەكە، لێرەدا ئەو نوخبەیە هەرچی میكانیزم وسیاسەتی سلبیە بەكاری دێنێ، كەشێكی وا ئەخولقێنێ كە رۆژانە باجی گەوجیەكانی ئەبێ تاكی ناهۆشیار بیدا، لێرەشەوە زەرەرمەند وقوربانی لەو مەیدانەدا ئەو تاكە ناهۆشیارە خۆیەتی، بەكورتی تاكی ناهۆشیار خۆی قوربانی دەستی خۆیەتی.
ئەگەر بێت وتاكی جیهانی سێیەم لەگەڵ جیهانی یەكەم بەراورد بكەین، زۆر ئاشكرایە كە تاكی جیهانی یەكەم ئاقڵتر وبەهرەمەندتر نیە، ئاشتی خوازتر وویژدان زیندووتر نیە، مرۆڤدۆستر نیە، بەڵكو تەنیا جیاوازی لە نێوانیان، تاكی رۆژئاوایی هۆشیاری زیاترە بەرامبەر خۆی وژیانی خۆی، بۆیەش خۆشەویستی ژیانی خۆی وای كردووە هەركەس لە شوێنی خۆیەوە بە گرنگی لە ژیان بڕوانێ، گرنگی ژیانیش ئینسانی گرنگتر كردووە، هەر ئەوەشە وای كردووە كە ژیانی خۆی نەكاتە قوربانی گەوجی سیاسیەك، بە ئاسانی فێڵی لێناكرێ، بۆیەش كەشێكی وای دروست كردووە كە حیزب وسیاسیەكان وهەتا سادەترین كارمەندی حكومی و ناحكومی بە حەزەرەوە هەڵسوكەوت ئەكا، لەولاشەوە خۆ هەر ئەو وڵاتانەن كە رۆژانە جۆرەها دەرمان وپیلان وچەكی ترسناك بەرامبەر وڵاتە دواكەوتووەكان بەكاردێنن، ئەو وڵاتانەیان كردووە بە پانتایەك بۆ بەدەست هێنانی ژیانێكی باشتری خۆیان، ئەگەر ساویلكەیی ودەستەمۆیی ئێمە نەبێ وئێمە شەڕ نەكەین ئەوان لە كوێ بەرهەمی چەكەكانیان ساغ بكەنەوە؟!
هەر بۆ نمونە؛ ئێمە وا راهاتووین بە چاوێكی زۆر رێز وشەرمەوە سەیری تاكی ئەوروپی وئەمریكی ئەكەین، وا مان لێهاتووە كە باسی ئەو وڵاتانە ئەكەین یەكسەر بیرمان بۆ فەنتازیایەك ئەچێ كە پڕە لە گوڵ ولە خۆشەویستی ومرۆڤدۆستی، بەڵام بێ ئاگاین كە ئێمەین قوربانی ئەو ژەهرەی كە رۆژانە ئەوان بۆمانی دروست ئەكەن، ئەو كلاشینكۆفەی رۆژانە ئێمە خوێنی یەكدی پێ ئەڕێژین سەرچاوەكەی روسیایە ومیخایل کلاشینکۆف کردوویەتیە هەدیەی مرۆڤایەتی، ئەو لوغمانەی ئێمە ئەكاتە قوربانی وكەم ئەنداممان ئەكا زۆربەیان بەرهەمی وڵاتی ئافرەت وئارامیە كە سویدە، ئەو دەمانچەیەی كە ئێستا هەم نرخی گرانە هەم زۆر ترسناكە وبەكاردێ بەرهەمەكەی ئی وڵاتی نەمسایە( دەمانچەی گلۆك)، ئەوە جگە لە تێكڕای چەك وبەرهەمە سەربازیەكان كە زۆربەی ئی ئەمریكایە، بەرامبەر ئەوانەش ئێمە لە نیعمەتی نەوت وكانزاكان بێ بەشیان ناكەین، لە ئاسار وفكرە نوێكان بەشیان ئەدەین وئەیان ژیێنین!
بەهاری وڵاتانی ناوچەكە نمونەیەكی زیندووە لەسەر ئەم مەسەلەیە، بەبەراورد لەگەڵ وڵاتانی رۆژئاوا زۆر بە روونی مەسەلەكە روونەبێتەوە، بۆیە هەموو ئەو قەیران وبەدبەختیانەی كە تاكی ئێرە گیرۆدەی بووە، سەرچاوەكە وتاكە هۆكار كە كاریگەری زۆر گەورەی هەیە تەنیا ئاستی نزمی هۆشیاری تاكەكانە بەرامبەر ژیان وخودی خۆیان، هەر بۆیە گۆران ئەبێت لە ناخی ئینسان خۆیەوە دەست پێبكات، دوای بەجێ هێنانی ئەركەكەی كە گۆڕان وچاكسازیە لە خۆیدا، لە ئاستی هۆشیاری وبەرزکردنەوەی ئاستی رۆشنبیری خۆی بە هەموو لقەکانیەوە، ئەوكات بەدوای مافەكانیدا بگەڕێ وبیستێنێت.
ئەگینان هەر ئاوا ئەمێنینەوە، ئەبینە یاریەك بەدەست ئەوانەی كە پروپاگەندەی یەكسانی ئەكەن، بەڵام جیهانیان دابەش كردووە بەسەر سێ چین، ئەوانەی پروپاگەندەی ئاشتیخوازی ئەكەن ورۆژانە چەكمان پێ ئەفروشن وژیانیان لەسەر تەقاندنی ئەو فیشەكانەیە كە ئێمە بەیەكدیەوە ئەنێین، ئەوانەی پروپاگەندەی ئارامی ومەترسی وڵاتە سەربازیەکان ئەكەن وخۆشیان كون وكەلەبەری دنیا نەماوە بنكەی سەربازی تێدا دانەنێن...